Ukuma manzonzo kwezinto kuhulumende womanyano lokudonselana okuqhubekayo phakathi kwamabandla abumba luhulumende kubikwa kubuyisela muva intuthuko kwezamabhizimisi. Lokhu kukhulunywe ngumphathintambo obona ngezamabhizimisi lokuthengiselana uMnumzana Welshman Ncube emhlanganweni labezamabhizimisi eHarare namhla.
UNcube uthe ukumisa ubudlelwano labe ZANU PF kuhulumende womanyano okwenziwe licele le MDC elikhokhelwa nguMnumzana Morgan Tsvangirai ngeviki edluleyo, kwenza abamabhizimisi akwamanye amazwe bathandabuze ukuletha amabhizimisi abo kweleZimbabwe. UNcube uthe amabandla womathathu akuhulumende womanyano asevumelene ukulungisisa konke okuhluphayo masinyane.
UMnumzana Sam Ncube ngusomabhizimisi wakoBulawayo njalo engumqondisi wenhlanganiso ye Affirmitive Action Group. UNcube utshele uBrenda moyo westudio 7 ukuthi amabandla akuhulumende womanyano kumele aphangise ukulungisisa okusele kulenga kuhulumende lo alandele iziqondiso ze Global political Agreement, ukuze inotho yelizwe ithuthuke.
