Umanyano weSADC uthi uzathumela abaphathintambo bedale leTroika hatshi inkokheli yalamazwe. Lokhu kucunule icele leMDC elikhokhelwa nguMnu. Morgan Tsvangirai elithi lelinyathelo kalisoze liphathise ukuxazulula inkinga yeZimbabwe.
IMDC ibikhangelele ukuthi inkokheli yalamazwe izobamba uMongameli Mugabe ngamandla kodwa unobhala jikelele walelibandla, uMnu. Tendai Biti utshele iStudio7 ukuthi abaphathintambo laba kabasoze benelise ukukhuza uMugabe.
Sikhuluma nje, inhloko kahulumende njalo engumkhokheli weMDC, UMnu. Morgan Tsvangirai ubelomhlangano loMongameli wele Angola, UMnu. Jose Eduardo Dos Santos ngoLesihlanu ephakathi kwemizamo yokudinga uncedo lwamazwe eSADC ukuthi aphathise ukuxazulula udaba lweZimbabwe kulandela ukusuka ngangxane okwenziwa libandla lakhe.
Kunjalo nje, iziphathamandla zecele leMDC elikhokhelwa nguMnu Morgan Tsvangirai ziqhube umhlangano eHarare ngoLwsihlanu labameli benhlanganiso ezizimele zodwa zibachasisela ngokuphuma nganxanye kwebandla leli kuhulumende womanyano.
Ekhuluma emhlanganweni lo, uNkosazana Thokozani Khupe, ongumsekeli kaTsvangirai ugcizelele ukuthi ibandla lakhe kalisoze liphatheke kunhlelo zeCabinet kanye leCouncil of Ministers kuze kulungisiswe konke okuhluphayo kuhulumende lo. Umanyano wenhlanganiso ezizimeleyo, iCrisis in Zimbabwe Coalition kanye lenhlanganiso yezifundi, iZINASU ngezinye zenhlanganiso ezileziphathamandla ezingene kulumhlangano.
Umsekeli wesikhulumeli seMDC kaTsvangirai uNkosazana Thabitha Khumalo uchasisele uNtungamili Nkomo weStudio7 ngomhlangano ababe lawo labenhlanganiso ezizimeleyo.
