Ekuqhubekeni kokuhlukuluzwa kwamalunga ecele leMDC elikhokhelwa nguMnu Morgan Tsvangirai, kuthunjwe umqondisi obona ngezokuhambisa kubandla leli ngoLwesibili, uMnu Pascal Gwezere, kodwa utholakele ngolweSithathu.
Ibandla likaTsvangirai lithi uGwezere uthunjwe ngamadoda ayisithupha emzini wakhe eMufakose. Amadoda la abikwa ebehlome ngemibhobho ehamba ngemota yohlobo lwe Isuzu elombala oyi grey ebingela ma number plates njalo amthethe emtshela ukuthi usebotshiwe.
Ngemva kwesikhatshana semthethe, kubikwa kuphenduke amadoda amabili emzini kaGwezere ayathatha umakhalekhukhiwni womkakhe amtshela ukuthi uGwezere ahambe laye esititshini samapholisa eMarimba.
UMnu Gwezere ubikwa elethwe
emzini wakhe ngoLwesithathu ekuseni kodwa abeMDC bathi ubengakhulumi lutho - yeka khona ukuthi ubengaphi lokuthi ubethethwe ngobani - ngoba ubekhanya
ethuke kakhulu ethithibele.
Ukuthunjwa kukaGwezere kulandela imizamo yokuthumba njalo esinye isiphathamandla saleli bandla ngoLwesibili, uNkosikazi Edith Mushaire laye ophunyuke ngemva kokuhlaba umkhosi lapho amadoda amabili ezama ukumthumba duzane lamawofisi ebandla lakhe eHarvest house.
Kulabasekeli beMDC abedlula amakhulu amabili abathunjwe babulawa nyakenye ngaphambilini kokhetho lwe run-off, becobodiswa ngabasekeli bebandla likaMongameli Robert Mugabe, iZanu PF.
Umsekeli wesikhulumeli seMDC kaTsvangirai uNkosazana Thabitha Khumaloutshele uBrenda Moyo weStudio 7 ukuthi ibandla lakhe lizahlala phansi liqoqe ukuthi amalunga alo angazivikela njani kuzehlakalo ezifana lalesi.
