Iqula leSadc Troika elizehlaziya indlela uhulumende womanyano asebenza ngayo eZimbabwe liqalise umsebenzi walo ngolweSine ngokuhlangana leziphathamandla zamabandla akuhulumende lo.
Iqula leli lihlangane njalo lomkhokheli welinye lamacele eMDC njalo engomunye wabasekeli benhloko kahulumende, uMnu Arthur Mutambara. NgolweSihlanu khona lithi lizahlangana loMongameli Robert Mugabe kanye loMnu Morgan Tsvangirai libuzisisa ukuthi kanti vele kuyini okuhluphayo kuhulumende.
Abakuqula leTroika leli bagoqela abaphathintambo beSwaziland, Mozambique kanye leZambia, okuyiwo amazwe abumba iSadc Troika.
Ekhuluma lentathelizindaba eHarare, umabhlane weSadc uMnu Tomaz Salomao, yena ohamba lequla leli, uthe iSadc ikhathazeke kakhulu ngokufuthelana okukhona kuhulumende okubangele ukuthi iMDC kaTsvangirai iphume nganxanye kuye.
I Sadc icelwe nguMnu Tsvangirai ukuthi izelungisisa okuhluphayo kuhulumende womanyano, okugoqela ukwala kukaMugabe ukufungisa osibalukhulu bezabelo abeMDC lokungahloniphi isivumelwano seGlobal Political Agreement.
Ingcwethi ecubungula ezombusazwe, uMnu Khuli Mathulela Sibanda utshele uNtungamili Nkomo weStudio 7 ukuthi kaboni iTroika isenelisa ukuyixazulula ingxaki yeZimbabwe ngoba iSadc ngokwayo ikhanya imesaba uMugabe kanti njalo laye ekhanya engayihloniphi.
