Iqula leSadc Troika elizehlaziya indlela uhulumende womanyano asebenza ngayo eZimbabwe liqhubekele phambili ngenhlolisiso yalo ngoLwesihlanu lahlangana loMnu Morgan Tsvangirai loMongameli Mugabe.
Iqula leli liqalise inhlolisiso yalo ngoLwesine ngokuhluphayo kuhulumende wobambano njalo liqede umsebenzi walo ngoLwesihlanu. Ngemva kokuhlangana loTsvangirai loMugabe, leli qula lihlangane lamalunga eJomic.
Ekhuluma lentatheli ngemva kokuhlangana labeSadc Troika, uTsvangirai uveze ukuthi iSadc izakwenza umhlangano kusikhatshana esizayo ihlaziye udaba lweZimbabwe, kubike intatheli yethu uThomas Chiripasi.
Umgcinisihlalo weSadc njalo enguMongameli weDRC, uMnu Joseph Kabila, yena obeseSouth Africa ngoLwesihlanu wazise ukuthi uzakuya kweleZimbabwe esuka kulelo lizwe ukuyazama ukulungisisa okuhluphayo kuhulumende womanyano.
UKabila wethule amazwi la ngemva kokukhulumisana loMongameli Jacob Zuma. Uthe laloba uhulumende lo ebhekane lobunzima obumangalisayo, kavumelani lembono yokuthi ulakho ukubhidlika; kubike intatheli yethu uBennedict Nhlapho.
Imbiko esiyamukeleyo iveza ukuthi iqula leSadc Troika likhuthaze uTsvangirai ukuthi ibandla lakhe libuyele kucabinet lakuCouncil of Ministers lapho elinqume khona ukuthi kalisoze libe lisaphatheka kumaviki amabili edluleyo, lisithi lizaphatheka kungalungisiswa okuhluphayo.
Kodwa umsekeli wesikhulumeli seMDC kaTsvangirai uNkosazana Thabitha Khumalo, utshele uNtungamili Nkomo weStudio 7 ukuthi ibandla lakhe kalisoze libuyele kungatsha zombili nxa izikhalazo zalo zingalungisiswanga.
