Inhlanganiso yeKimberly Process Certification Scheme isungule umhlangano namhla ophela ngolweSine kwele Namibia, wokuhlaziya udaba lokwephulwa kwamalungelo oluntu ekwenjiweni kwama diamonds koChiadzwa koMarange esigabeni seManicaland. Umhlangano lo ukhangela njalo ukuthi eleZimbabwe njengoba lehlulekile ukulandela izinqumo ezenziwe yinhlanganiso le, ethekelele ilizwe ngenyanga kaNhlangula, lingamiswa na ukuthengisela amazwe omhlaba amadiamonds alo okwenyanga eziyisithupha.
IKimberly Process, ngemva kokwethekelea eleZimbabwe, inqume ukuthi kususwe amalunga ebutho koChiadzwa ngoba ehlukuluza izakhamizi lezethekeli kulindawo,kodwa uhulumende ubikwa wengezelele inani lamabutho kulindawo. IKimberly Process yacebisa njalo uhulumende weZimbabwe ukuthi adinge inkampani ezakwemba amadiamonds akoChiadzwa okusemthethweni, kodwa eleZimbabwe alenzanga lutho kwaphelela emoyeni.
Inhlanganiso elwela ilungelo loluntu eye Human Rights Watch ikhuthaza ukuthi eleZimbabwe limiswe ukuthengisa madiamonds alo kwamanye amazwe ngoba ukuhlukuluzwa kwabantu kulokhe kuqhubeka. IHuman Rights Watch ithi amasotsha lamapholisa abulele abantu abedlula amakhulu amabili koChiadzwa nyakenye.Inhlanganiso le yenze eyinye inhlolisiso koChiadzwa ngenyanga edluleyo yafumana ukuthi ukuhlukuluzwa kwabantu makhaza kulokhe kuqhubeka njalo sokufike kubanga eliphezulu.
UMnumzana Walter Nsununguli Mbongolwane yingcwethi kwezenotho. UMbongolwane utshele uBrenda Moyo weStudio 7 ukuthi eleZimbabwe lingamiswa ukuthengisa amadiamonds lizalahlekelwa yimali enengi kakhulu.
