Uhulumende ubikwa elokhu edingisisa ngezikhali athi zintshontshwe ePomoma Barracks e Harare kumaviki edluleyo, njalo imbiko etshiyeneyo ithi kulamasotsha avalelwe enkambeni ye Chikurubi, lapho ahlukuluzwa khona kakubi, kudingisiswa ngokuthi izikhali lezi, ezigoqela imibhobho yemihlobo etshiyeneyo, zingabe zingaphi.
Kuke kwaguduzwa endlini yeziphathamandla zecele le MDC elikhokhelwa nguMnu. Morgan Tsvangirai eHarare ngodaba lolu, njalo kwabotshwa ezinye iziphathamandla zalelicele. Icele leli lithi le yindlela ka mongameli Robert Mugabe yokuhlukuluza amalunga alo.
Ukuze sizwe ukuthi udaba lolu lungabe lukhombani kwezombusazwe, uSithandekile Mhlanga westudio 7 uxoxe loMnu. Rejoice Ngwenya, ingcwethi ecubungula ezombusazwe, yena othi leli liqhinga likahulumende elaziwayo, elokuhlukuluza abaphikisana laye.
