ISadc Troika ithi izaba lomhlangano wokuhlaziya udaba lweZimbabwe kweleMozambique eMaputo ngolweSine.
UMongameli Robert Mugabe, uMnumzana Morgan Tsvangirai kanye loMnumzana Arthur Mutambara bazaphatheka kulumhlangano ndawonye leziphathamandla zamabandla abo.
Umhlangano lo wenziwa ngemva kwenhlolisiso enziwe liqula leTroika eHarare ngeviki edluleyo phezu kwendlela uhulumende womanyano asebenza ngayo.
Isethula imibiko le iSadc Troika, umgcinisihlalo weSadc ngokwayo njalo enguMongameli weDRC uMnumzana Joseph Kabila ubehlangana eState House loMongameli Mugabe emizameni yokulungisisa udaba lweZimbabwe.
UKabila uphinde wahlangana loTsvangirai loMutambara ntambama. Ekhuluma lentathelizindaba ngemva kokuhlangana loMugabe, uKabila uthe iSadc izimisele ukulungisisa konke okuhluphayo elizweni; kubike uThomas Chiripasi.
Kodwa abanengi bathi iSadc yinja engelamazinyo, njalo ayisoze yenelise ukulungisisa udaba lweZimbabwe.
Ingcwethi kwezombusazwe, uMnumzana Mlamuli Nkomo uthi kaboni uKabila, njengomgcinisihlalo weSadc esenelisa ukuphatha udaba lweZimbabwe ngendlela esuthisayo ngoba ekhanya engumuntu osekela uMongameli Mugabe.
