Umthethwandaba waphezulu unqume ngolweSihlanu isiphathamanlda secele le MCD elikhokhelwa nguMnu. Morgan Tsvangirai, uMnu Pascal Gwezere, owetheswa icala lokuntshontsha izikhali ePomona Barracks eHarare, ayekwelatshwa ngodokotela abazimeleyo, njengalokhu okukhalazwe ligqwetha lakhe.
UGwezere, othethwe emzini wakhe kumaviki amabili edluleyo, ngabantu
abacatshangelwa ukuthi zinsoli zikahulumende, njalo engazakali ukuthi ungaphi,
ubonakale esemiswe phambi komthethwandaba ngeviki ephelileyo.
Igqwetha lakhe, uMnu. Alec Muchadehama, uthi uphathwe kubi esezandleni zamapholisa, yikho elesilonda esibi, esilokhu siqhela, kanye lezinye inhlungu.
Ukuze sizwe ukuthi kambe imithethwandaba ye Zimbabwe ilokhu iqhuba imisebenzi yayo ngemfanelo, uSithandekile Mhlanga we studio 7 uxoxe legqwetha, uMnu. Sithambelumthetho Ngwenya, ukuze sizwe imbono yakhe ngaloludaba.
Kolunye udaba oluphathelene lezemthethwandaba, umlimi we Beatrice, uNkosikazi Hester Theron ongumfelokazi oseluphele, ugwetshwele ukuhlala ejele inyanga ezintathu ngoba esala ukusuka epulazini uhulumende asefuna ukulithatha, esithi usehlale khona phose impilo yakhe yonke, njalo kalandawo angaya khona.
Kodwa uNkosikazi Theron kasoze ahlale ejele ngoba isigwebo lesi silengisiwe okweminyaka emihlanu.
