Umkhokheli wenhlanganiso yezisebenzi eyeZimbabwe Congress of Trade Unions uMnumzana Lovemore Matombo lezinye iziphathamandla zenhlanganiso le ezine babotshiwe izolo ntambama beqhuba umhlangano lezisebenzi edolobheni le Victoria Falls. UMatombo obotshwe ndawonye loMnumzana Percy Mcijo, Michael Kandukutu, Dumisani Ncube loMnumzana Nawu Ndlovu babotshelwe ukuqhuba umhlangano bengacelanga imvumo emapholiseni, bavalelwa ubusuku bonke.
Inhlanganiso ye ZCTU ihle yaphangisa ukwazisa amagqwetha eZimbabwe Lawyers for Human Rights ayiwo akhethe uNkosazana Nomagugu Mahlangu ukumela uMatombo labanye bakhe. UMatombo labanye bakhe bakhangelelwe ukumiswa phambi komthethwandaba kusasa njengokutsho kukagqwetha.
Inhlanganiso yezisebenzi emhlabeni jikelele eye International Trade Union Confederation lebandla le MDC elikhokhelwa nguMnumzana Morgan Tsvangirai basole kakhulu ukubotshwa lokuhlukuluzwa kweziphathamandla ze ZCTU.
UBrenda Moyo weStudio7 uxhume umsekeli kanobhala jikelele we ZCTU uMnumzana Japhet Moyo othi isifundo esikhulu ngokubotshwa kweziphathamandla zenhlanganiso yakhe yikuthi laloba besenza imihlangano emincinyane okungakanani bazacela imvumo, kumbe ukwazisa amapholisa.
