Elinye icele lenhlanganiso yezifundi eye Zimbabwe National Students Union i ZINASU namhla lethule umbiko wokuthi amapholisa abophe inkokheli yenhlanganiso le eBindura University of Science and Education izolo.
Izifundi lezi nguRespect Ndanga, Welcome Zimuto, Tafadzwa Kutya lomunye okuthiwa ngu Mudzengi njalo izifundi lezi zibotshwe ngemva komhlangano wokukhankasela inkokheli entsha u Paul Dakarai. ababotshiweyo labe bavalelwe enkambeni yamapholisa eBindura. Inhlanganiso le ibika njalo ukuthi amapholisa adinga umkhokheli wecele leZINASU leli uClever Bere.
Kudaba olufanayo, umkhokheli wenhlanganiso yezisebenzi uMnumzana Lovemore Matombo lezinye iziphathamandla zenhlanganiso le ababotshwe ngeSonto ntambama edolobheni le Victoria Falls besetheswa icala lokwenza umhlangano bengacelanga imvumo emapholiseni, balokhe bevalelwe.
Abanye ababotshwe loMatombo ngoMnumzana Percy Mcijo, Michael Kandukutu, Nawu Ndlovu lo Dumisane Ncube. UNkosazana Nomagugu Mahlangu ligqwetha lababotshiweyo laba. UNkosazana Mahlangu utshele UBrenda Moyo weStudio 7 ukuthi uMatombo labanye bakhe abasayanga emthethwandaba namhla kodwa sebekhangelelwe ukuya khona kusasa.
