amalinks wokungena

Breaking News

Sizahamba KuCabinet Kusasa:  Kugcizelela UTsvangirai


Egcizelela isinqumo esithethwe libandla lakhe ngeviki edluleyo, uMnu Morgan Tsvangirai wazise ukuthi ngoLwesibili uzaphatheka emhlanganweni wedale leCabinet ngoLwesithathu kanye laphathintambo becele lakhe leMDC.

UMnu Tsvangirai utshele intathelizindaba eHarare ngoLwesibili ukuthi ukhangelele ukuthi inkulumo phakathi kwakhe, uMongameli Mugabe loMnu Arthur Mutambara ziqale kunsukwana ezizayo njalo kulungisiswe konke okuhluphayo kuhulumende womanyano.

I MDC kaTsvangirai ikhalale ukuphatheka emihlanganweni yeCabinet leCouncil of Ministers kumaviki amathathu edluleyo isithi ifuna kulungisiswe okuhluphayo kuhulumende kuqala.

Kodwa uTsvangirai wazise ngeviki edluleyo ngemva komhlangano weSadc Troika eMozambique ukuthi ibandla lakhe selizaphatheka njalo emihlanganweni yeCabinet inkulumo zokuzama ukulungisisa okuhluphayo zisaqhubeka.

Imihlangano yeCabinet yenziwa maviki wonke ngoLwesibili, kodwa umhlangano obumele wenziwe ngoLwesibili usuzakwenziwa ngoLwesithathu ngoba uMonganeli Mugabe ubengekho elizweni.

Umsekeli kaTsvangirai uNkosazana Thokozani Khupe utshele uNtungamili Nkomo weStudio 7 ukuthi bakhangelele ukuthi konke okuhluphayo kulungisiswe ngokuphangisa kunsukwana ezilandelayo.

Ezinye indaba zeStudio 7...

‚Äč
XS
SM
MD
LG