Umeli weKwekwe Central kudale lephalamende njalo elilunga leMDC, uMnu Blessing Chebundo, obesetheswa umlandu wokuvengula untombazana oleminyaka elitshumi lantathu utholakale emsulwa ngumthethwandaba ngolweSibili.
UChebundo, olilunga lecele leMDC elikhokhelwa nguMnu Morgan Tsvangirai utshengise ukujabula okukhulu ngesinqumo sikamantshi uWilliam Bhila. UChebundo ubevele elilandula leli cala.
Esethula isinqumo sakhe emthethwandaba kamantshi eGweru, uBhila uthe akula bufakazi obaneleyo obuveza sobala ukuthi ngempela uChebundo wabamba untombazana lo.
Uthe njalo umamangala uqambele umthethwandaba amanga ngokuthi uChebundo nguye owamkhipha ubuntombi bakhe lokuthi ngaphandle kokubanjwa nguChebundo, wayengakaze aye emacansini.
Umantshi wengeze wathi lokhu akuqondanga ngoba ubufakazi obethulwe phambi kwenkundla ngudokotela, buveze ukuthi umamangala wayeseke waya emacansini kanengi-nengi, hatshi kanye kuphela loChebundo njengokutsho kwakhe.
UMnu Chebundo ngumeli weMDC kaTsvangirai wesine ephalamende ukutholakala engelacala kusukela ngeviki edluleyo. Abanye babalisa uMnu Thamsanqa Mahlangu omela iNkulumane, uGift Mabhena oweHwange West loMnu Heya Shoko omela iBikita West.
Umsekeli wesikhulumeli seMDC kaTsvangirai, uNkosazana Thabitha Khumalo utshele uNtungamili Nkomo weStudio 7 ukuthi ukuhlukuluzwa kwamalunga ebandla lakhe kuqhubekela phambili kungelani lokulahlwa kwamacala abane laba.
