Inhlanganiso elwela ilungelo loluntu, eye Women of Zimbabwe Arise, IWOZA, ithi inengi lokhu lihlupheka elizweni lanxa sokulo hulumende womanyano njalo umahluko ungaba khona kungalotshwa kutsha isisekelo sombuso, esitsha, kwenziwe ukhetho olukhululekileyo.
Inkokheli yalinhlanganiso, uNkosikazi Jenny Williams loNkosazana Magodonga Mahlangu, bakhonapha eMelika ukuzokwamukela isicoco se Robert F. Kennedy Human Rights Awards, esiphiwe uMahlangu ngendlela yokunanza umsebenzi awenzayo, kanye lenhlanganiso yakhe, owokulwela ilungelo loluntu eZimbabwe.
Isicoco, lesi siza lemali engangamaDollar eMelika inkulungwane ezingamatshumi amathathu-US$30 000, kanye loncedo lokuthi i WOZA iqhubeke ithola uncedo lokulwela amalungelo oluntu. USithandekile Mhlanga we Studio 7 uxoxe lo Nkosazana Mahlangu ochasisa okunengi ngalesi sicoco.
