Imidlalo yePremier Soccer League iqhubekele phambili ngoLwesithathu endaweni ezitshiyeneyo zelizwe njalo iqembu leHighlanders liqhubeke liwisa ezimathonsi kulandela ukunqotshwa kwalo yiHwange nge 2 ka 1 emdlalweni odlalelwe enkundleni yeBabourfields koBulawayo.
Abasekeli beHighlanders, yona enqotshwe yiDynamos ngeSonto, bathi bebekhangelele ukuthi iqembu labo liyiwise phansi gophondo iHwange, kodwa kwehlule lokhu.
Emdlalweni wakuqala wePSL phakathi kwamaqembu womabili la iBosso bayinqobile njalo nge 1 ka 0 ngoMabasa.
INjube Sundowns yona inqobe iKiglon nge 2 ka 1 emdlalweni odlalelwe ePelandaba kuthi iHighway yona ihlankale iEagles nge 4 ka 0. Umdlalo lo udlalelwe enkundleni yeSakubva.
Umdlalo wokucina ubuphakathi kweCaps United leBlack Rhinos. Abasekeli bamaqembu la abanengi babikwa behambe ukuyabukela umdlalo lo enkundleni yeRufaro lapho iCaps United enqobe khona iRhinos nge 1 ka 0. Ukunqotshwa kweRhinos kutsho ukuthi siphumile kuPSL.
NgoLwesihlanu khona, iqembu leBantu Rovers lizangqikilana "lentshantshu" zeShooting Stars enkundleni yeBabourfields koNtuthuziyathunqa. IBantu ngelinye lamaqembu angadlali kuhle kuPSL njalo alakho ukususwa kuLeague lonyaka.
Unobhala jikelele weHighlanders uAndrew Lutho Tapela yena otshele uNtungamili Nkomo ukuthi inkinga ngeqembu lakhe yikuthi alilabadlali abadlala phambili (strikers) abalomnkantsho.
