Ibandla leMDC elikhokhelwa nguMnu Morgan Tsvangirai lithi laloba liphikisa ukufungiswa kwamalunga edale lephalamende ukuthi aqale umsebenzi ngoMvulo, amalunga alo azakuyagcotshwa lawo aphatheke kulumkhosi.
UTsvangirai ngokwakhe ubetshele
intatheli ekuqaleni kweviki ukuthi ibandla lakhe liyakusekela ukuvulwa
kwephalamende, lamuhla uphume emaphephandabeni eseziphikisa kulokhu.
Utshele intatheli kwele Kenya ukuthi
ukuvulwa kwalelidale kutsho ukuthi uhulumende uzakuba seyephule isivumelwano
sememorandum of understanding sona esithi idale leli kalimelanga liqalise
umsebenzi inkulumo zingakaphethwa.
UTsvangirai wethekelele inhloko kahulumende kwele Kenya uMnu Raila Odinga, bekhulumisana ngodaba lweZimbabwe.
Unobhala
jikelele webandla lakhe uMnu Tendai Biti uthi laloba bengavumelani lokuqala
umsebenzi kwephalamende, amalunga abo azahamba ukuze ayekhetha usomlomo wephalamende kanye lomsekeli wakhe.
Konke lokhu sokwenziwe ngoMvulo, uMongameli Mugabe uzavula okusemthethweni idale ngolweSibili.
Laloba iMDC ingamnanzi uMugabe njengomongameli, amalunga alelibandla abikwa ezakuba khona kulumkhosi, kutsho isiphathamandla salelibandla uMnu Sam Sipepa Nkomo.
