EleZimbabwe likhwele kungalane yamazwe athwele gadalala eyeFailed States Index lisuka kuzinga lesine lisiya kuzinga lesihlanu lonyaka.
Lokhu kuvezwe yinhlanganiso ye Fund For Peace eqoqa lingalane minyaka yonke. Omunye wabaqoqe ugwalo lwengalane lolu, uMnu Nate Haken uveze ukuthi lokhu kubangelwe ngumnotho kanye lezombusazwe, okungamanga kuhle elizweni.
Uthi nxa udaba lwezombusazwe lungalungisiswanga ngokuphangisa, umumo uzaqhubeka usiba mubi elizweni. Kungalane le iSomalia yiyo ekhokhelayo, ilandelwa yiSudan kube sokusiba leZimbabwe.
I Iraq, yona elempi evutha bhe, ikuzinga lesihlanu, isuka kuzinga lesibili ngomnyaka odluleyo, okutsho ukuthi umumo eZimbabwe mubi ukwedlula owe Iraq.
Ingcwethi ecubungula ezombusazwe njalo eligqwetha elilwela ilungelo loluntu uMnu Emmanuel Hlabangana uthi iZimbabwe ilakho ukucina sikuzinga lakuqala nxa izinto zingalungisiswanga ngokuphangisa.
