Ekuqhubekeni kokuhlukuluzwa kwalabo abalwela ilungelo loluntu lentathelizindaba elizweni inhlanganiso ye Law Society of Zimbabwe ibelomhlangano namhla emini eHarare yanquma ukuthi izathatha amanyathelo athile kuviki ezayo.
Lumhlangano uhlaziye udaba lokubotshwa kwegqwetha elilwela ilungelo likazulu, uMnu. Aleck muchadehama lapho amalunga alinhlanganiso atshengisele ukucunuka kakhulu ngaloludaba. UMuchadehama ubotshwe ngoLwesithathu esetheswa icala lokukhulula izibotshwa ezinthathu okungekho emthethweni.
Umhlangano lo unqume ukuthi uzakusa izikhalazo lezi kumphathintambo obona ngezemithetho, laku Chief Justice, kumphathintambo obona ngokwenzakala elizweni (Home Affairs) lakugwetha elikhulu likahulumende, lisithi amalunga alo azafola edolobheni leHarare njengendlela yokwazisa uhulumende ngezikhalazo lezi. UBrenda Moyo weStudio 7 ukhulume lomkhokheli we Law Society of Zimbabwe uMnumzana Josephat Tshuma othi ngesikhathi okumele kwakhiwe uhulumende womnayano aqine, kukhanya kulabanye abafuna ukubhidliza.
Igwetha elilwela amalungelo kazulu uMnumzana Alec Muchadehama lamhlanje ukhutshwe esitokisini ngemva kokuhlawula imali yesibambiso, ibail efika kukhulu lamadola akwele Melika, i$100 .intathelizindaba yethu u Mark Peter Nthambe usethulela loludaba.
Ezinye Indaba ZeStudio7...
