Amaqula amela amacele womabili eMDC lawe Zanu PF akhangelelwe ukuba lomhlangano eSouth Africa ngolweSihlanu ekhulumisana ngokuthi ingxaki ezikhona kunkulumo phakathi kwamabandla la zingaxazululwa njani.
UMongameli Thabo Mbeki, ongumlamulankunzi kudaba lweZimbabwe ubehlele ukuthumela iqula lakhe kusasa eHarare ukuyakhulumisana lamaqula la phezu kokuthi inkulumo zingavuselelwa njani.
Izithunywa zikaMbeki zibalisa oMnu Sydney Mufamadi, Gumbi Majanko loFrank Chikane. Kodwa lokhu kucine kuguquliwe, abeZimbabwe sekuyibo abayahlangana lezithunywa zikaMbeki eSouth Africa ngolweSihlanu.
UMbeki ubikwa efuna inkulumo lezi ziphethwe ngokuphangisa kubunjwe uhulumende womanyano. Inkulumo lezi zisele zilenga ngemva kokuba kube lokungavumelani phakathi kukaMnu Morgan Tsvangirai owelinye lamacele eMDC loMongameli Robert Mugabe.
Ugwalo lokwabelana amandla phakathi kweZanu PF le MDC lubusiswe yinkokheli yamazwe eSadc emhlanganweni wayo oqhutshelwe kweleSouth Africa mhlaka 16 kuyonale inyanga.
UTsvangirai walile ukuloba igama lakhe kulolu gwalo laloba inkhokheli yeSadc izame ukumbonisa ngobuhle balo esithi alumuphi mandla eneleyo.
ISadc ngokwayo ibikwa isinikeze uMugabe imvumo yokuthi aqhubeke ngokukhetha
amalunga edale leCabinet ngeviki ezayo nxa uTsvangirai eyabe elokhu
engafuni ukuloba igama lakhe kugwalo lwesivumelwano.
Phansi kwaleso sivumelwano, uMongameli Mugabe ulelungelo lokukhetha amalunga edale leCabinet alitshumi lanhlanu, uTsvangirai alitshumi lantathu kuthi uMutambara amathathu kuphela.
Nxa uTsvangirai eyabe elokhu engavumi kulokhu, kusiyafika iviki ezayo, uMugabe ubikwa ezakhetha amalunga akhe alitshumi lanhlanu avunyelwa ukuwakhetha phansi kwalolu gwalo.
Ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi ukuvuselelwa kwenkulumo yinto elindelwe nguzulu ngoba efuna udaba lweZimbabwe lulungisiswe ngokuphangisa.
