Laloba amaphephandaba amanengi ebika ukuthi akusensuku zatshwala ukuthi ibandla leZanu PF lilobelane phansi isivumelwano leMDC phezu kokwabelana umbuso, imbiko esiyitholayo iveza ukuthi kuseselobunzima obengeziweyo kunkulumo eziqhutshelwa kweleSouth Africa.
I Zanu PF ibikwa isima ngokuthi uMongameli Robert Mugabe kumele ale enguMongameli welizwe njalo elamandla edlula akaMnu Morgan Tsvangirai oweMDC. Kodwa abeMDC labo babikwa besemba phansi besithi uTsvangirai, nxa elokuba yinhloko kahulumende kumele anikezwe amandla edlula akaMugabe.
Olunye udaba oluhluphayo ngolokuthi uhulumende omutsha, uzabusa okwesikhathi esinganani kungakenziwa ukhetho olutsha. Ibandla leMDC lithi lifuna uhulumende omutsha abuse okweminyaka emibili kuphela kungakenziwa ukhetho, kodwa abeZanu PF bathi bafuna iminyaka emihlanu. Ngalokhu, inkulumo lezi zibikwa zilakho ukutshaya umduli, njalo uMongameli Thabo Mbeki ubikwa elakho ukubuyela eZimbabwe kuyonale iviki ukuyakhulumisana loMugabe.
Umanyano wamazwe womhlaba eye United Nations, yazise lamuhla ukuthi ukhangele ngelihlo lokhozi inkulumo phakathi kwamabandla womabili. Uthi njalo zingehlula, udaba lweZimbabwe luzabuyiselwa kuSecurity Council luhluzwe iZimbabwe ithathelwe amanyathelo alukhuni.
Ingcwethi ehlaziya ezombusazwe uMnu George Mkhwanazi utshele uNtungamili Nkomo weStudio 7 ukuthi ukwethusela okwenziwa yi UN kulungile ngoba kubandezela amabandla la ukuthi avumelane.
