Ingxabangxoza yombango wezikhundla ibikwa iqhubekela phambili kubandla leZANU PF okubikwa sokulomkhankaso ngamanye amalunga alelibandla wokuthi uMongameli Robert Mugabe atshiye isikhundla sokukhokhela lelibandla, lokuthi ngubani ozathatha lesisikhundla.
Abazi ngokwenzakalayo kulelibandla bathi kulamaxuku angaba mathathu kulo umbango athi elikhokhelwa nguMnumzana Emmerson Munangagwa, elikhokhelwa nguMnumzana Solomon Mujuru, labanye abasekela uMongameli Mugabe. IZANU PF ilomhlangano walo wecongress ngenyanga ka December lapho okuzavunyelwana khona ukuthi uMugabe uyaqhubeka na ekhokhela lelibandla kumbe hatshi.
UBrenda Moyo weStudio 7 ukhulume lengcwethi ecubungula ezombusazwe uMnumzana Mqondobanzi Magonya othi ingxabangxoza eku ZANU PF ilakho ukuphazamisa kakhulu uhulumende womanyano.
