EleBhilithani lithi lilokufuthelana okukhulu ngokuvinjwa yiRussia kanye keChina kwezijeziso ebezizakwethulelwa uhulumende kamongameli Robert Mugabe yiUnited Nations.
Inhloko kahulumende walelilizwe uMnu Gordon Brown uveze lamuhla ukuthi ilizwe lakhe lizabuyela ku United Nations ngodaba lweZimbabwe likhankasela ukwethulwa kwezijeziso lezi.
UBrown uthi ulethemba lokuthi izijeziso ze European Union zizabandezela uhulumende kaMugabe kabuhlungu. Ngakwelinye icele iziphathamandla ezimela iZanu PF lamacele womabili eMDC eziphatheke kunkulumo ezilawulwa ngumongameli Thabo Mbeki, zikhangelelwe ukuhlangana kuliviki zihlaziya udaba lwenkulumo ezimqoka ezizalandela emizameni yokulungisisa udaba lweZimbabwe.
UmMbeki yena ubikwa ezakuba lomhlangano lomgcinisihlalo weAfrican Union Commission uMnu Jean Ping ngoLwesihlanu kweleSouth Africa. UMnu Ping ubikwa ezahlangana njalo lomgcinisihlalo weAfrican Union uMnu Jakaya Kikwete kuliviki behlaziya udaba lweZimbabwe.
Ababili laba bakhangelelwe ukubhekisa amabombo eZimbabwe kumalanga ambalwa alandelayo ukuyakhulumisana leZanu PF leMDC. Isikhulumi sikaMbeki uMnu Mukoni Ratshitanga utshele iStudio 7 ukuthi uMbeki nguye ocele lumhlangano lo Ping ukuthi amazise ngenkulumo azilawulayo phakathi kweMDC leZanu PF.
Ingcwethi ecubungula ezombusazwe uMnu Mandlenkosi Gatsheni utshele uNtungamili Nkomo weStudio 7 ukuthi ukuhlanganisa amakhanda kuka Ping, uMbeki loKikwete kulakho ukuthela izithelo ngoba uMbeki eyedwa kukhanya seyehlulekile ukulungisisa udaba lweZimbabwe.
