Abadlali beqembu lenguqu eleHighlanders bathi sebemtholile umaqondana, njalo bathi bakhulekela ukuba inkokheli yaleli qembu ibavumele bamfake indandatho.
Iqembu leli like likubone okwengidi kunyanga ezedluleyo liqeqetshwa nguMohammed Fathi lapho ebeseliphenduke laba livaka elibhuqwa yiloba yiliphi iqembu.
Ngokutshiya kukaMohammed, inkokheli yeBosso yethese uMkhuphali Masuku inkatha yokukhokhela leliqembu isadinga umqeqetshi opheleleyo.
Selokhu wathathayo intambo uMasuku, yena owaziwa kakhulu ngelithi Mr. Khupha, ulilolonge laba zintshantshu ezinqobayo leliqembu, okwenza abadlali bathi bafuna aqhatshwe abe nguye umqeqetshi weHighlanders opheleleyo.
Sibuze omunye wabadlali beBosso, uGift Lunga ukuba muthi bani uMkhuphali abapha wona kulezinsuku oyenza babe liqembu elilohlonzi elinqobayo kumidlalo yalo.
"Akulamuthi, yikusebenzelana ndawonye nje sihloniphana njengeqembu," uphendule kanjalo uLunga.
