Ugatsha olubona ngezokudlelana lamanye amazwe kwele South Africa lube lomhlangano ngoMvulo labenhlanganiso ezilwela ilungelo loluntu, ngenjongo yokuchasisa inyathelo lika hulumende lo lokupha ingwalo zokuhlala kulelo lizwe kuzizalwane zeZimbabwe lezakwamanye amazwe.
Ngeviki edluleyo uhulumende weSouth Africa wazise ukuthi usezakupha ingwalo zokuhlala lokusebenza kuzizalwane zeZimbabwe kuqala abeselandela ngezizalwane zakwamanye amazwe.
Ingwalo lezi zizanikwa labo abazaveza ukuthi benzani kwele South Africa njalo abaphethe incwadi ezitshengisa ukuthi bayizizalwane zeZimbabwe.
Umqondisi wenhlanganiso ye Zimbabwe Exiles Forum uMnumzana Gabriel Shumba utshele lumsakazo ukuthi inhlanganiso ezilwela ilungelo loluntu ezingene umhlangano wanamhla lo zikhonona ngezinto ezimbalwa ezigoqela ukuthi isikhathi uhulumende weSouth Africa asiphe izizalawane zeZimbabwe ukuthi zilungisise ingwalo, sifitshane kakhulu.
Ezinye inhlanganiso ezingene umhlangano lo zigoqela amacele womabili eMDC, iSouth Africa lawyers for human rights lezinye ezimbalwa.
UBrenda Moyo weStudio 7 ukhulume legqwetha elilwela ilungelo loluntu uNkosazana Anna Moyo ochasisa amanyathelo okumele athathwe yilabo abafuna ingwalo zokuhlala kwele Southa Africa.
