Abamela ibandla leZanu PF lamacele womabili eMDC kunkulumo zokuxazulula okuhluphayo kuhulumende womanyano baqhubekele phambili bekhulumisana ngoLwesibili ngemva kokwehluleka ukugqiba inkulumo lezi ngoLwesithathu.
Umlamulankunzi kudaba lweZimbabwe njalo enguMongameli weSouth Africa, uMnu Jacob Zuma ulaye kumaviki amabili edluleyo ukuthi abakunkulumo laba kumele bahlangane okokucina bekhulumisana ngoMvulo ngaphambilini kokuthi bamnikeze ugwalo oluveza impumela yenkulumo lezi ngoLwesithathu.
Kodwa abazi ngokwenzakalayo bathi abakunkulumo laba behlulekile ukuvumelana ngoMvulo mhlaka 29. Iqula likaZuma, lona elifike elizweni ngoMvulo lihlangene labakunkulumo laba ngoLwesibili lamukela ugwalo lwempumela yenkulumo lezi.
Abamela amabandla akhulumisanayo bona baqhubeka besala ukuveza isimo senkulumo. Ingcwethi ecubungula ezombusazwe uMnu Mlamuli Nkomo utshele uNtungamili Nkomo ukuthi sesanele isikhathi sokuthi inkulumo lezi zigqitshwe.
