Amabandla akuhulumende womanyano athi ajabule kakhulu ngendlela uMongameli Jacob Zuma weSouth Africa aqhube ngayo inkulumo zokuzama ukulungisisa okuhluphayo phakathi kwawo.
UZuma ugqibe uhambo lwakhe eHarare ngoLwesine waveza ukubana sokube lokuvumelana entweni ezitshiyeneyo phakathi kweZanu PF leMDC.
Uthe njalo amabandla la kumele agqibe inkulumo zawo inyanga le ingakapheli. UMnu Renson Gasela ngumsekeli wesikhulumeli secele leMDC elikhokhelwa nguMnu Arthur Mutambara. UGasela uthi bajabule kakhulu ngokungenela kukaMnu Zuma emizameni yokuqeda ingxabano ekhona kuhulumende.
Amazwi kagasela agcizelelwe ngumsekeli wesikhulumeli seMDC ekhokhelwa nguMnu Morgan Tsvangirai, uNkosazana Thabitha Khumalo. UMnu Chris Mutswangwa olilunga leZanu PF laye uthe ibandla lakhe liyajabula ngemizamo kaMongameli Zuma.
