Abenhlanganiso yabalwa impi yenkululeko bathi umhlangano wabo lomongameli Robert Mugabe, ekuqaleni kukaMabasa, uzoveza okubalulekileyo indlela ezalandelwa kwelakusasa lelizwe kanye lelebandla elibusayo eleZanu PF.
Ekhuluma emhlanganweni owenzelwe edolobheni leChinhoyi, owake waba ngumphathintambo wabalwa impi laba, umnumzana Christopher Mutsvangwa uthi umhlangano loMugabe umqoka njengoba kuyiwo ozaveza sobala elakusasa lelizwe ukuthi liqonde kuphi kanye lelebandla elibusayo le Zanu PF.
UMutsvangwa uthi abalwa impi laba yibo abenza laba khona ibandla leZanu PF kanye lokusabalala kwalo elizweni ngakho uMugabe angeke abalahla lamuhla, okubangele ukuba khona kwalomhlangano.
UMutsvangwa uthi abenhlanganiso yakhe sebenze isivumelwano sokuba abanjwe ngamandla uMugabe ukuba axotshe amanye amalunga eZanu PF, abalisa obona ngokuqoqwa kwenhlelo zebandla umnumzana Saviour Kasukuwere, amalunga edale laphezulu elePolitiburo anjengomnumzana Jonathan Moyo, Patrick Zhuwao kanye lommeli wesigaba se Hurungwe West, unkosikazi Sarah Mahoka, bethi ngoba yibo abakhankasela ukuba khona kwexuku ebandleni se "Generation 40".
Ubeka leli xuku labantu be G40, umlandu uMutsvangwa wokufuna ukuhluthuna ibandla besebelibhidliza.
Umnumzana Thabiso Njovana, isakhamuzi semzini we Glen Lorne, eHarare, uthi lumhlangano ubizwa nguMugabe nje esenanzelele ukuqakatheka kwabalwa impi yenkululeko empilweni yakhe kwezombusazwe.
Lokhu, uNjovana ethi, usekwenza ngoba esenanzelele iphutha abeselenzile njalo kuyibo abathembileyo ukumcedisa ukudinga usekelo ngokwethusela abantu ukuba bamvhotele ngokhetho.
Kubikwa sekulamaxuku amabili ebandleni leZanu PF, abangisana amandla wokukhokhela kanye lokuzothatha intambo zombuso lapho umongameli Mugabe esengasekho esetshiye leso sikhundla.
Elinye lala maxuku likhokhelwa ngophethe isikhundla sokuba ngumsekelli kamongameli, umnumzana Emmerson Mnangagwa, elaziwa ngelokuthi yiTeam Lacoste, eliyilo elisekelwa ngabalwa impi yenkululeko laba. Kuthi elinye ngelaziwa ngelokuthi G40 elibikwa likhokhelwa ngumkamongameli uNkosikazi Grace Mugabe.
Lumhlangano ongenwe ngabalwa impi yenkululeko abavele ezigabeni eziyisitshiyagalombili, uvumelene ukuba kungekho ozaxotshwa ebandleni leZanu PF, engowalwa impi ngoba kungabantu abazinikela kakhulu kilo.
Bathi kungesi qiniso lokho osokukhulunywa ukuba sebefuna ukuguqula umkhokheli wabo.
UMutsvangwa uthi lumhlangano loMugabe, uzangenwa ngabalwa impi uqobo okubalisa okhokhela ibutho u Army General Constantine Chiwenga, okhokhela amabutho alwa ngendizamtshina, u Airforce Commander Vice Marshall Perence Shiri, u army commander General Phillip Valerie Sibanda, owezamajele uPrisons Chief General Paradzai Zimondi kanye loskomitshi wamapholisa uPolice Commissioner General Augustine Chihuri.
