Enye inkokheli yecele leMDC elikhokhelwa nguMnu. Morgan Tsvangirai engqotshwe kukhetho lwemhlanganweni weCongress isizithola isikhona njalo kudale elimqoka le National Council. Linkokheli ikhethwe phansi kwesisekelo sombuso walelibandla esiguqulwe kancane ukuze kuthathwe leli nyathelo.
Kodwa osekuzondise abanye abasekeli balelibandla yikuthi ikhomidi ye Standing Committee ekhokhelwa ngu Tsvangirai ikhethe abantu abalitshumi lanhlanu sona isisekelo sombuso walelibandla sisithi kumele kukhethwe abalitshumi kuphela. Iphephandaba le Herald lithi lokhu kulethe ukufuthelana kulelibandla okubangele ukuthi enye inkokheli itshaywe ngabasekeli emahofisini alelibandla ngoLwesine.
Kodwa lelibandla liyalandula limbiko. Abanqotshiweyo asebekhethiwe, bagoqela obengumqoqi wenhlelo zalelibandla, uMnu. Elias Mudzuri, owayengumsekeli wesikhulumi, uNkosazana Thabitha Khumalo lowayengumgcinisihlalo wabasakhulayo, uMnu. Thamsanqa Mahlangu.
UChris Gande weStudio 7 uxoxe losengumsekeli obona ngokuqoqa inhelo zebandla, uMnu. Abednico Bhebhe othi bavumelene ukukhetha abantu abedlula inani elivunyelwa yisisekelo sombuso ngoba befuna ukuthi kungabi lokukhonona ebandleni.