Udaba lokusilela kwenqubelaphambili kwesigaba seleMandebeleni luqhubeka lokhu lusidla ubhedu kulesi sigaba. Udaba lolu luqale kumaviki ambalwa asanda kweldula ngusibalukhulu wakobulawayo, uMnu. Cain Mathema, owebandla leZanu PF, aze athi abantu besigaba seMandebeleni bangamavila kodwa bona baqambizela uhulumende besithi nguye ongalethi nqubelaphambili.
Kwalandela umsekeli kaMongameli, uMnu. John Nkomo laye egcizelea amazwi kamathema esithi abantu besigaba semandebeleni kabasukumeli phambili bangomadolanzima. Kodwa ngempelaviki ilunga lePolitburo yeZanu PF, uMnu. Joshua Malinga uthe udubo lusenkokhelini yesigaba lesi hatshi uzulu mathupha. Sixoxe laye uMalinga sambuza ukuthi kanti vele kungaba kuyini okwenqabela inqubelaphambili kulesi sigaba.
Kunjalo nje, ingcwethi ecubungula ezombusazwe, uMnu. Walter Nsununguli Mbongalwane utshele iStudio 7 ukuthi udubo lubangelwa yinkokheli yeZanu PF.