Abantwana beZimbabwe bathi bafuna isisekelo sombuso esitsha simumathe ukuthi uhulumende abancedise ukufinyelele ezempilakahle lula, ukufunda ngaphandle kwembadalo, ukufinyelela amaphilisi ama ARVs, njalo kube lokuthula elizweni.
Lokhu kuvezwe lugwalo oluqhutshelwe ikhomidi ye COPAC ngolweSine ngamalunga edale lephalamende yabantwana, kulandela umhlangano obuqoqwe lugatsha olubona ngamalungelo abantwana kumanyano we United Nations, i UNICEF, ngolweSithathu.
Kusenjalo, izakhamizi ze Harare zithi lokhu zifuthelene kulandela udlakela oluqhamuke kulelidolobho kuqoqwa imbono yabantu ngempelaviki edluleyo. Udlakela lolu lubangele ukuthi uhlelo lolu lumiswe kulelidolobho.
UNkosikazi Beatrice Ngwenya isiphathamandla se Combined Harare Residents Association, utshele uSithandekile Mhlanga weStudio 7 ukuthi izakhamizi zifuna kube lokuthula kulelidolobho uhlelo lolu lungakaqaliswa.
Umhlangano wokubuthanisa imibono kazulu ezangena kusisekelo sombuso welizwe owenzelwe e Jairos Jiri ube liphutha ngemva kokuba abantu abacatshangelwa ukuba ngamalunga e ZANU PF befike bafaka eyabo imibono hatshi eyabantu abagogekileyo.