Ugatsha lwezempilakahle ngoMvulo luqalise uhlelo lokuhlaba abantwana abaleminyaka engaphansi kwemihlanu ijekiseni ele Vitamin ‘A’ eyokuvikela umkhuhlane wamadlala, leminye etshiyeneyo.
Umphathintambo wezempilakahle uMnumzana Henry Madzorera utshele iStudio 7 ukuthi lolu luqhutshwa endaweni ezitshiyeneyo zelizwe wathi zinengi indawo zokukuhlabisela abantwana.
Ngakho uMadzorera uthe abahlala emaphandleni abasoze bahambe umango omude ukufinyelela lezindawo. Uhlelo lolu luphela ngolweSihlanu. Kodwa uMnu Madzorera uthe amalanga okuhlabisa alakho ukwengezelelwa nxa kudingeka.
Ukhansila ka Ward 20 ko Bulawayo, uMnumzana Ernest Rafa Moyo utshele uSithandekile Mhlanga weStudio 7 ukuthi indwendwe bezibonakala e wardini yakhe yeNkulumane 12, okutshengisa ukuthi inengi labesifazane lilalele inkuthazo yamakhansila lemikhankaso ka hulumende emisakazweni, eyokuthi bayehlabisa abantwana.