Amalunga edale leCabinet etheswa njalo icala lokungayi edale lephalamende ukuyaphendula imibuzo yamalunga edale leli. Loludubo lubikwa selufike kusibanga esibi ngoba ngoLwesithathu kuye ilunga elilodwa, umphathintambo wezemali, UMnu. Tendai Biti phakathi kwamalunga angamatshumi amane.
NgoLwesithathu maviki wonke amalunga edale leli ayabe ebuza amalunga edale leCabinet imbuzo ephathelene lengatsha zikahulumende. NgolweSithathu umsekeli wenhloko kahulumende, uMnu. Arthur Mutambara nguye ocine ephendula imibuzo. Loludubo luqale kunyanga ezedluleyo amalunga aze alobela inhloko kahulumende ukuthi ixazulule loludaba kodwa kukhanya kungaphathisanga.
Umlawuli wedale lephalamende, uMnu. Lovemore Moyo utshele iStudio 7 ukuthi lanxa izandla zakhe zizimfitshane kuloludaba ulecebo angathandanga ukuliveza afuna ukulisebenzisa ukuze amalunga edale lecabinet azophendula imibuzo.