Ngesikhathi kulemibiko yokuvumbuluka kodlakela ezigabeni ezimbalwa zelizwe abasakhulayo becele leMDC elikhokhelwa nguMnumzana Morgan Tsvangirai batshengisele ngolweSihalnu edolobheni leHarare befuna ukuthi labo abadala amacala okuhlukuluza,lokubulala ngaphambilini kokhetho luka 2008 kumele bamiswe phambi kwemithethwandaba umhlaka 15 Mabasa engakafiki.
Abasakhulayo labo bafole besuka emahofisini eMDC eHarvest house baya emahofisini ogatsha lwezokuxolelana, lemahofisini omphathintambo obona ngezemithetho lapha abatshiye khona ingwalo zokukhonona.
Ngasikhathi sinye amalunga edale lephalamende kucele leMDC ekhokhelwa nguTsvangirai asefake isicelo kulelidale sokuthi kukhangelisiswe udaba lodlakela olwenzakala ngo 2008.
UMnumzana Alois Dzvairo ngumgcinisihlalo wohlangothi lwabasakhulayo kunhlanganiso elwela ukulotshwa kutsha kwesisekelo sombuso iNational Constitutional Assembly.
UDzvairo utshele uBrenda Moyo weStudio 7 ukuthi udlakela osolukhanya soluvuka ezigabeni ezitshiyeneyo zelizwe luzaphazamisa kakhulu uhlelo lokulotshwa kutsha kwesisekelo sombuso.
