Abasekeli becele le MDC elikhokhelwa nguMnu. Morgan Tsvangirai ababikwa bebalekela udlakela emizini yabo eHarare kulandela udlakela oluqhamuke kulelidolobho kunsuku ezimbalwa ezedluleyo babotshiwe ngoMvulo ntambama endlini yenkonzo lapho abakade becatshise amakhanda khona, baze bakhululwa ngoLwesibili ekuseni.
Abantu laba, abagoqela abantwana abancinyane labesifazana, babikwa besedlula ikhulu njalo amapholisa abakhulule esithi bengaphatheki kwezombusazwe.
UNkosazana Thabitha Khumalo, umsekeli wesikhulumi secele le MDC elikhokhelwa nguMnu. Morgan Tsvangirai uchasisele uSithandekile Mhlanga weStudio 7 okunengi ngaloludaba.
Kusenjalo, abathenga bethengisa impahla eHarare, incgwethi kwezenotho kanye lezakhamizi zedolobho leli bathi udlakela olwenziwe ngabalandeli bebandla le Zanu PF eHarare lubangelwe yikufuna ukuthatha imikambo yokuthengisa impahla etshiyeneyo lokukhahlameza abalandeli be Movement for Democratic Change (MDC) hatshi ukunikeza inotho ezandleni zabansundu kuhlelo lwe Indigenization.
Bathi iZanu PF icatsha ngohlelo lwe Indigenization ukwenzela ukuhlasela abe MDC abasemikambo le.
Umqondisi we Harare Residents Trust uMnu. Precious Shumba uthi abalandeli be Zanu PF bafuna ukwenza imali ngokubhadalisa abantu makhaza imali yokuba lendawo yokuthengisela.
Umuntu munye ngamunye olendawo yokuthengisela ubhadaliswa idola ngelanga ngabalandeli be Zanu PF.
Ingcwethi kwezenhlalo kazulu uNkosikazi Thabitha Ncube uthi lokhu okwenziwa ngabe Zanu PF akusoze kuphe muntu inotho kuhlelo lwe Indigenization.