Inkokheli yamabandla akuhulumende womanyano ibikwa ivumelane ukuthi izizalwane zeZimbabwe ezihlala emazweni akhelane leleZimbabwe zivote kukhetho oluzayo. Iphephandaba le The Sunday Times lakwele South Africa lithi lilencwadi elotshwe ngumabhalani omkhulu wedale leCabinet loMongameli Mugabe, uMnu. Misheck Sibanda ecebisa ugatsha lwezemithetho ukuthi lufake linguquko emthethweni ozethulwa edale lephalamende ophathelane lokhetho.
IZanu PF ibikwa lokhu isala ukuthi izizalwane zeZimbabwe ezisemazweni zivothe ngoba la mazwe afakela iziphathamandla zeZanu PF izijeziso zenotho.
UChris Gande weStudio 7 uxoxe lomunye wabakuqula lamabandla axazulula okumunyetwe yisivumelwano sokubunjwa kukahlumende womanyano, uMnu. Moses Mzila Ndlovu owecele leMDC elikhokhelwa nguMnu. Welshman Ncube othi ngempela baluhlafune lolu daba kodwa kabavumelananga baze baluqubela inkokheli yamabandla.