Abatshutshisi bakweleSouth Africa bathi sebeqalisile ukukhulumisana lamapholisa ngesinqumo somthethwandaba esibamba uhulumende walelolizwe ngamandla ukuthi abophe iziphathamandla zeZimbabwe ezetheswa icala lokwephula ilungelo loluntu.
Umthethwandaba weGauteng High Court unqume ngoLwesibili ukuthi eleSouth Africa kumele libophe bonke abeZimbabwe abetheswa umlandu wokuhlukuluza uzulu, nxa bethe bangena kulelolizwe.
Isinqumo lesi samukelwe ngabalwela amalungelo oluntu ikakhulu kweleSouth Africa kanye laseZimbabwe. Kodwa abeZanu PF bayasisola kakhulu.
Inhlanganiso yeZimbabwe Exiles Forum leyeSouthern African Litigation Center yizo ezikhweze loludaba emthethwandaba zifuna bonke abetheswa icala lokwephula ilungelo loluntu, ikakhulu abeZanu PF, babotshwe nxa bethe bangena kweleSouth Africa.
Umphathintambo wezemithetho uMnu Patrick Chinamasa, olilunga leZanu PF uthi umahluli owethule lesisinqumo ngomunye wezitha zeZimbabwe ezijonge ukungcolisa igama lelizwe ngaphambilini kohambo lwesithunywa senhlanganiso yomanyano wamazwe womhlaba eye United Nations esibona ngezamalungelo oluntu uNavi Pillay.
IPillay ukhangelelwe ukufika eZimbabwe mhlaka 20 kulinyanga. Isiphathamandla seNational Prosecuting Authority eSouth Africa uMnu Mthunzi Mhaga uthi nxa belakho ukuphikisa isinqumo lesi, bakhangelelwe ukwenza lokhu phakathi kwamaviki amabili azayo.
Ingcwethi kwezombusazwe uMnu Brilliant Mhlanga uthi kaboni uhulumende weSouth Africa elandela isinqumo lesi ngoba ukwenza lokhu kuzadala ukufuthelana okukhulu phakathi kweZimbabwe lalelo lizwe.
