Iziphathamandla zeEuropean Union sezikhuthaze uMongameli Jacob Zuma weleSouth Africa ukuthi angenele ngamandla kudaba lweZimbabwe kulungisiswe konke okuhluphayo kungakayiwa kukhetho.
Iziphathamandla lezi zihlangene loMongameli Zuma eSouth Africa ngoLwesine kukhulunyiswana ngodaba lobudlelwano phakathi kweSouth Africa lomanyano we EU.
Udaba lweZimbabwe lalo luhlafuniwe uZuma esithi iEU kumele yesule izijeziso eyazifakela uMongameli Robert Mugabe labanye bakhe kubandla leZanu PF.
Kodwa abe EU bathe izijeziso zizakwesulwa nxa bengasuthiseka ngenguquko kwezombusazwe.
Bathe kumele kulungisiswe umhlahlandlela wokhetho ozakwenza kungabi lokuqilibezela ekuqhutshweni kwalo.
