Abebandla leMDC elikhokhelwa nguMnumzana Arthur Mutambara bathi akula kukhonona kulelibandla ngamazwi akhulunywe ngumkhokheli walo ephalamende ngolweSithathu.
UMutambara, ephendula imibuzo edale lephalamende, uthe umthethwandaba weSupreme Court yiwo wodwa olakho ukuxazulula udaba lokukhethwa kwabameli bakwamanye amazwe, kanye labosibalukhulu bezabelo okwenziwe ngumongameli Robert Mugabe engakhulumisananga labanye bakhe kuhulumende womanyano.
Isivumelwano se Global Political Agreement besikubeke sobala ukuthi kudaba lwabosibalukhulu ibandla leMDC elikhokhelwa ngu Tsvangirai belizathola izikhundla ezinhlanu, ele ZANU PF ezine kuthi elika Mutambara esisodwa, kodwa akusabanga njalo.
UBrenda Moyo weStudio 7 uxoxe lomsekeli wesikhulumeli sebandla elikhokhelwa nguMutambara, uMnumzana Nhlanhla Dube othi abezindaba bazama ukufuqa into engasiyo eyakhulunywa kumbe eyayitshiwo nguMutambara
