Ibandla leZapu lecele leMDC elikhokhelwa nguMnumzana Morgan Tsvangirai athi afuna iSadc ithumele amapholisa ukuzelondoloza ukuthula elizweni ngaphambilini kokhetho oluzakwenziwa ngomnyaka ozayo.
Ekhuluma ekweleSouth Africa ngemitshina yeVideo link emhlanganweni obuqoqwe yinhlanganiso yeFreedom House yaseMelika, umkhokheli weZapu uMnu Dumiso Dabengwa uthe ibandla lakhe lifuna kwenziwe ukhetho ngomnyaka ozayo njalo iSadc kumele ithumele abazazolondoloza ukuthula.
UDabengwa uthe ibandla lakhe alijabuli lakancane ngokudonselana okukhona kuhulumende womanyano phakathi kweZanu PF lamacele womabili eMDC.
Uthe ukhetho yilo lodwa olungaba yisisombululo kulinkinga. UDabengwa uthe noma sokutheni uMongameli Mugabe angeke anqobe kukhetho oluzayo.
Okhokhela iMDC kaMnu Tsvangirai edale lephalamende uMnu Innocent Gonese laye obekhuluma ngeVideo link eseSouth Africa, uthe ibandla lakhe lifuna iSadc ingenele kudaba lokhetho ukuze kungabi lodlakela njalo kungaze kwaba lokuphikisana ngempumela yalo.
Ohlaziya ezombusazwe njalo eyintathelizindaba uMnu Takura Zhangazha uthe kaboni ukhetho lusenziwa ngomnyaka ozayo ngoba ilizwe lingakazilungiseleli.
Bebuzwa, uDabenga loGonese ukuthi babona amapholisa lamabutho evuma ukwamukela ibandla elizanqoba kukhetho elingayisilo leZanu PF, ababili laba bathe kabalakuthandabuza ukuthi lokhu kuzakwenzeka.
