Abekomidi yedale lephalamende ababona ngokuqhutshwa kohlelo lokulotshwa kwesisekelo sombuso abe COPAC bathi sebemukele ingwalo ezimbalwa ezimumethe imibono yenhlanganiso ezehlukeneyo ukuthi ingene kusisekelo sombuso.
Inhlanganiso lezi zigoqela eziselizweni lezinye ezezizalwane zeZimbabwe ezihlala kwamanye amazwe. Eyinye inhlanganiso ephume logwalo lwesisekelo sombuso ngeye Zimbabwe Law Society.
Imibono yezizalwane zeZimbabwe ezihlala kwamanye amazwe ivele kunhlanganiso yeGlobal Zimbabwe Forum elamalunga kwele Melika, Canada, Belgium lakwamanye amazwe. Inhlanganiso zakwele Bhilithane ezigoqela iCouncil for Zimbabwe Christian Leaders lazo zifake imibono yazo.
Imibono yezizalwane zeZimbabwe ezihlala kwele South Africa iqoqwe zinhlanganiso ezigoqela amacele womabili e MDC, ibandla leZAPU, inhlanganiso yeZimbabwe Exiles Forum, lezinye.
Imibono yonke evela kulabo abahlala kwamanye amazwe iqoqwe yabalugwalo eSouth Africa, oluhle lwathunyelwa kwabe COPAC ngoMvulo odluleyo.
UBrenda Moyo weStudio 7 ukhulume lomunye wabagcinisihlalo beCOPAC uMnumzana Edward Mkhosi ochasisa okuzakwenziwa ngemibono ehlukeneyo le evela ebantwini.
