amalinks wokungena

Breaking News

Abelungu Ngabantu Bokuza Asibafuni Lapha - Mugabe


Emazwini alakho ukwengezelela ukufuthelana okuvele kubhahile kuhulumende womanyano, uMongameli Mugabe uchothoze ibandla leMDC ngolweSihlanu esithi lisetshenziswa ngabelungu, bona athi ngabantu bokuza abangasela sabelo eZimbabwe.

UMongameli Mugabe wethule amazwi la evula okusemthethweni umhlangano webandl alakhe leZanu PF congress eHarare. UMugabe uphinde wasola amazwe angentshonalanga ngokwethulela iZanu PF izijeziso, esithi kumele zesulwe.

Wengeze wathi iMDC kumele ikhankasele ukuthi izijeziso lezi sesulwe ngoba kuyiyo ecele ukuthi zifakwe. Ngaphandle kokuchothoza abelungu lebandla leMDC, uMugabe usole amalunga eZanu PF esithi ukulwisana kwawo phezu kwezikhundla sokubulele ibandla leli.

UMongameli Mugabe uthe ukulwisana lokhu yikho okubangele ukuthi iZanu PF inqotshwe kukhetho olwedluleyo. Ngalokhu, ukhuthaze ukubambana phakathi kwamalunga ebandla lakhe, esithi induku kayakhi muzi.

Uphinde wasoma njalo iMDC ekhokhelwa nguMnu Morgan Tsvangirai ngokukhetha uMnu Roy Bennette ukuthi abe ngumsekeli kamphathintambo wezokulima, esithi uBennett ngumuntu wokuza loba nje ezalelwe eZimbabwe.

Ngalokhu uMugabe uthe uBennett kamelanga angene kuhulumende. Umsekeli kaTsvangirai, uNkosazana Thokozani Khupe ulandule imbiko kaMongameli Mugabe yokuthi ibandla lakhe lisetshenziswa ngabelungu.

Ekhuluma phezu kodaba lwezijeziso, ingcwethi ecubungula ezombusazwe uMnu Mandlenkosi Gatsheni utshele uNtungamili Nkomo weStudio 7 ukuthi kaboni amazwe angentshonalanga ezesula.

Kunjalo nje, amapholisa abikwa ehlolisisa incwadi zikamakhalekhukwini (text messages) ezithunyelwa abantu akhuthaza ukuthi uMugabe ayephumula atshiye ukukhokhela iZanu PF.

Lanxa umsakazo weZBC usithi imbiko le ithunyezwa yizitha zebandla leli, kulembiko yokuthi yethulwa ngabasakhulayo beZanu PF. Yona inkokheli yebandla leli iyilandule limbiko.

Kodwa ilunga leZanu PF politburo, uMnu Joram Gumbo utshele uSithandekile Mhlanga weStudio 7 ukuthi ibandla lakhe lizaphuma kuCongress ngoMgqibelo liqine saka.

‚Äč
XS
SM
MD
LG