Bekuyisiphiphiphithi ezigabeni ezitshiyeneyo zelizwe ngempelaviki iziphathamandla zeZANU PF lezeMDC kaMnu Morgan Tsvangirai zisenza imihlangano zikhuthaza uzulu ukuba ayevota ngobunengi kukhetho oluzayo.
UMnu Tsvangirai ngokwakhe uqede impelaviki yonke ekoBulawayo ekhulumisana labasekeli bebandla lakhe, ekhuthaza labasakhulayo ukuthi bayebhalisa kuluhlu lwabalelungelo lokuvota, i voters roll ukuze labo benelise ukuvota.
UTsvangirai wengeze wathi ibandla lakhe lizimisele ukungena kukhetho lungenziwa yiloba nini. Kodwa uthe nxa kulodlakela, kasoze aphatheke.
Ngakwelinye icele, umsekeli kaMongameli Mugabe njalo eyisiphathamandla seZANU PF uNkosikazi Joyce Mujuru ukhuthaze abasekeli bebandla lakhe ukuba babambane batshiyane lokudonselana ukuze banqobe kukhetho.
UNkosikazi Mujuru wethule amazwi la ngoMgqibelo emihlanganweni ayenze eMashonaland East, Harare leManicaland, okuyizigaba esezithe zifuna uMugabe abe nguye ozancintisa emele iZANU PF kukhetho lokudinga umongameli.
Okuphume obala kunkulumo kaTsvangirai loMujuru ngempelaviki yikuthi amabandla womabili aseqalisile ukukhankasela ukhetho uMugabe athi luzakwenziwa ngomnyaka ozayo.
Ukuhlaziya loludaba sixhume umqondisi wenhlanganiso yeDiaspora Dialogue uMnu Immanuel Hlabangana.
Kunjalo nje ingcwethi kwezenotho zithi umkhankaso wokhetho awusoze uphazamise kangako intuthuko yenotho yelizwe, kodwa uzaqambula imali ebezimele ziphathise uzulu kunhlelo zentuthuko isisiwa kunhlelo zokhetho.
Ingcwethi kwezenotho uMnu Rejoice Ngwenya utshele uBrenda Moyo weStudio 7 ukuthi umnotho welize bekumele uqale uqine andubana kwenziwe ukhetho elizweni.
