Icele le MDC elikhokhelwa nguMnu. Arthur Mutambara lethule umbiko othi iziphathamandla zalo ezibhubhe engozini yomgwaqo ngempelaviki, UMnu. Lyson Mlambo loNkosazana Ntombizodwa Gumbo bazangcwatshwa ngolweSithathu eGweru le Mberengwa ngokulandelana kwabo, kuthi umuyi uMnu. Renson Gasela yena angcwatshwe ngeNsonto ezayo epulazini lakhe eliphandle kwe Gweru.
UNkosazana Alice Nkomo, obeyisiphathamandla se ZANU PF esibhubhe ngelanga elifanayo engozini yomgwaqo, uphiwe inhlonipho yokuba liqhawe lesigaba, njalo uzabekwa ngoLwesine ko Bulawayo.
Kusenjalo, ibandla le ZAPU selethule umbiko wokukhalela imuli yababhubhileyo. Isikhulumi salelibandla, uMnu. Methuseli Moyo utshele uSithandekile Mhlanga we Studio 7 ukuthi kufanele ibandla le ZANU PF, lona eselizinike umlandu wokupha abantu inhlonipho yobuqhawe, likwenze ngokuphangisa nxa kubhubhe amalunga amanye amabandla, njengalokhu elikwenze kulunga lalo uMaNkomo.