Lamuhla kuhlelo lwethu Liphuma Lendaba Litshona Lendaba sixoxa lomfundisi Ray Motsi owenhlanganiso ye Christian Alliance ngoncedo abangaba belwenza ekuphathiseni ilizwe njengalokho abayake bakwenze.
Ngeminyaka edluleyo linhlanganiso kunye lezinye ezokholo ziphathise abantu abanengi ngesikhathi sodubo olugoqela ukudilizwa kwezindlu phansi kohlelo lwe Murambatsvina kunye langesikhathi sendlala.
UMotsi uthi indlala yalomnyaka ibathole bengazimiselanga kodwa balakho ukusiungula inhlelo ezingaphathisa abaswelayo.
"Kathesi besingakenzi amalungiselelo vele besingakhangeleli ukuthi kungaba lokudubeka koluntu ngendlela abantu abadubeka ngayo ngoba besikhangelele ukuthi izulu lizakuna ngesikhathi. Kusithole singazimiselanga sabona ukuthi abantu abatholanga lutho kome qha emasimini," kutsho uMotsi.
Uthi bazahla bekhuthaza uzulu ukuthi aqakathekise uluntu esebenzisa ilizwe likamlimu. Wengezelele esithi ilizwi lenkosi yilo elipha abantu ithemba lapho kungela themba.
"Kathesi besisakhulumisana labantu simemethekisa okumelane lekhomisheni yokuhlukuluzwa koluntu ukuthi kanti vele ikhomisheni le ngeyani lokuthi umthetho ozasetshenziswa kukhomisheni le ngowani. Lokuthi amakhomishina nxa esebuya abantu babekwazi ukuthi likhomisheni ngeyani," kuchasisa uMotsi.
Uthi loluhlelo olwekhomisheni yilo olwenze ukuthi bafake imizmo yabo yonke yokuthuthukisa ilizwe.
