amalinks wokungena

Breaking News

Ukhetho LweMelika 2020

Abogatsha lweUS GSA Lokhu Bengekemukeli Ukunqoba KukaMnu Joe Biden

UMnu Joe Biden lomsekeli wakhe uNkosikazi Kamala Harris

Ugatsha olubona ngokuqhutshwa komsebenzi kungatsha zikahulumende weMelika olwe US General Services Administration- GSA, lubikwa solungasazi ukuthi luthathe nyathela bani, ukusebenza lisamukela ukunqoba kukaMnu. Joe Biden lomsekeli wakhe uNkosikazi Kamala Harris na, loba hatshi.

Umqondisi weGSA uNkosikazi Emily Murphy, owabekwa kuleso sikhundla nguMongameli Donald Trump uthi uzakwenza lokho nxa esephiwe imvumo ngemva kokuba solugqitshiwe uhlelo lokuphikisa impumela yokhetho lolu kanye lokuba izigaba zonke zelizwe sezethule impumela yalo okusemthethweni ngenyanga ezayo kaMpalakazi.

Njengemvama nxa kuphuma omunye umkhokheli kungena omunye embusweni kweleMelika, kunje iqula likaBiden ngabe seliphiwa izigidi eziphose zifike ezilitshumi zamadola-$9.9m, evela esikhwameni sikahulumende ukuze kusungulwe ihlandla lakuqala lokuqhutshelwana intambo zombuso, lenelise ukuqatsha izisebenzi ezingaba zinkulungwane ezine- eziphuma ebandleni lakhe lamaDemocrats.

Obona ngokuqhutshwa kwenhlelo kuGSA, uMary Gilbert, ubikwa etshele izisebenzi zohlangothi lwakhe ukuthi okwamanje kungeke kwasungulwa inkulumo lequla likaBiden, okulakho ukudonsa kuze kuyefika inyanga ezayo lapho uTrump akhangelelwe ukugqiba uhlelo lwakhe lokuphikisa impumela yokhetho njalo izigaba zonke sezethule okusemthethweni impumela yazo.

Isimo esinje besesile minyaka engamatshumi amabili singazake senzakale. Inxabanxoza enjengale icine ukwenzakala ngokhetho lomnyaka ka2000 lapho kuze kunqikilane uMongameli George W Bush wamaRepublicans lomnumzana Al Gore, wamaDemocrats. U-Al Gore wacina esamukela ukunqotshwa ngemva kwenyanga ukhetho lwenziwe sokuke kwatshikiliswana emithethwandaba kwabalwa kutsha amavoti esigabeni seFlorida.

See all News Updates of the Day

ISupreme Court ePennyslvania Ilahla Icala Eliphanyekwe NguTrump Labanye Bakhe Abathi Baqilwa Kukhetho

UMongameli Donald Trump

Idale leSupreme Court esabelweni sePennyslyvania lithi uMongameli Donald Trump labanye bakhe behlulekile ukuveza ubuqili elithi benziwe libandla lama Democrats kukhetho olusanda kwenziwa endaweni le lapho uMnu. Joseph Biden anqobe khona uTrump ngamavoti afika phose inkulungwane ezilikhulu – 80,000.

Abahluli badale leli bavumelene izolo ukuthi akulalutho kudaba oluphanyekwe nguTrump lebandla lama Republicans elokuthi kulahlwe amavoti afika izigidi ezimbili – 2 million abantu abavota ngeposo, ikakhulu abakubandla lama Democrats.

Ibandla lama Republicans beselimise okwesikhatshana ukuba kuqhubekele phambili ukulungiselela ukukhetha abantu ababizwa ngokuthi ngama Electors abazakuya eWashington DC ukuyakhetha umongameli okusemthethweni.

UTrump usezame ukuguqula impumela yokhetho lolu ezabelweni ezitshiyeneyo esithi amaDemocrats aqila kukhetho lolu. Kodwa imithethwandaba endaweni ezinengi ithi akulakhetho olwaphekwaphekwa libandla leli.

Ababukele okwenzekalayo, bathi uTrump ubecabanga ukuthi uzathola elinye ithuba lokuba abuse kwele Melika kodwa ukhe phansi ngoba abantu basola indlela abuse ngayo kusukela ngomnyaka ka2016.

UMnu. Busani Mbuso Ntini uthi uBiden uselungiselela ukungena esikhundleni lobanje uTrump edonsela muva.

Uthi kusobala ukuba uBiden uthole amavoti amanengi elizweni lonke jikelele njalo lama Electoral Votes adlula okumele umuntu awazuze nxa engena esikhundleni sikamongameli.

UMnu. Peter Ngwenya uthi okwenzakala eMelika kuveza ukuba imithetho isebenza ngemfanelo.

UMnu. Belive Gaule, okubandla leZanu PF uthi okwehlele uTrump akufani lalokho okwehlela owayengumongameli uRobert Mugabe ngokhetho olwenziwa ngomnyaka ka2008 lapho anqotshwa nguMorgan Tsvangirai, owayekhokhela ibandla leMDC-T.

Okwamanje uTrump ukhangelelwe ukuba uzakhankasa eGeorgia lapho okulabantu abancintisana kukhetho lokudinga amalunga edale leSenate.

Ucele ukuba kubalwa kutsha amavote esabelweni lesi anqotshwa khona nguBiden. Indawo le ibisileminyaka eminengi ibanjwe libandla lama Republicans.

UTrump Lokhu Ekhonona Ngokhetho Olusanda Kwenziwa eMelika
please wait

No media source currently available

0:00 0:04:59 0:00


UTrump Uzasuka Esikhundleni uBiden Engavotelwa Ngabakhetha uMongameli

UTrump Uzasuka Esikhundleni uBiden Engavotelwa Ngabakhetha uMongameli
please wait

No media source currently available

0:00 0:04:19 0:00

UTrump Uthi Uzaphuma Esikhundleni uBiden Engavotelwa Kahle yiElectoral College

Election 2020 Wisconsin

UMongameli Donald Trump uthi uzasuka esikhundleni nxa abakhetha umongameli kwele Melika, besebenzisa lokhu okuthiwa yiElectoral College, bengakhetha uMnu. Joseph Biden, okhanya emqobe kukhetho olusanda kwenziwa.

UTrump wethule lokhu ngoLwesine kusihlwa eWashington DC ekhuluma lentathelizindaba ngesikhathi sekhefu leThanksgiving. Uthe uzasuka esikhundleni nxa iElectoral College ingabuya esigodlweni seMelika kumaviki ambalwa azayo bavotele uBiden.

Kaphumelanga egcekeni ebuzwa ukuba ulakho yini ukuyabona uBiden engena esikhundleni sikamongameli ngoZibandlela. Uthe okwamanje osalwisana lalokhu athi yikwebiwa kokhetho libandla lama Democrats.

UTrump usekhulume kakhulu ngalokhu loba kungelabufakazi ukuba waqilwa kukhetho lolu. Usezame ukuguqula impumela yokhetho lolu eveza ukuthi uBiden ulama Electoral Votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili – 232.

Okhethwa ukuba ngumongameli kumele athola amaElectoral Votes angamakhulu amabili lamatshumi ayisikhombisa – 270. Kumavoti elizwe lonke jikelele, UBiden ulamavoti adlula izigidi ezingamatshumi ayisitshiyangalombili – 80 million kuthi uTrump ulayizigidi ezingamatshumi ayisikhombisa lane – 74 million.

Olandela ukhetho lolu, uMnu. Okay Ndlovu, odabuka kwele Zimbabwe, uthi ukhetho lolu lwenziwe kahle.

UMnu. Isaac Mpofu laye uyalulandela ukhetho lolu.

Omunye njalo nguMnu. Aleck Nyathi kunengi okukhangelelwe ukuthi kuzakwenziwa nguBiden.

Lokhu kusekelwa nguMnu. Mongameli Moyo, obona engani ukhetho lulakho ukungaqhutshwa kahle.

Umongameli wakwele Melika ugcotshwa ngoZibandlela njengalokhu okubekwe kusisekelo sombuso welizwe. Kwenziwa loba obengumongameli engavumanga ukuba unqotshiwe kukhetho lukamongameli.

UTrump Uzasuka Esikhundleni uBiden Engavotelwa Ngabakhetha uMongameli
please wait

No media source currently available

0:00 0:04:19 0:00


'Ukhetho lweMelika Lusikhumbuza uMugabe Owala Ukuphuma Esikhundleni'

Kubalwa kutsha amavoti esabelweni seGeorgia.

Abantu kwele Zimbabwe bathi okwenzakala eMelika kubakhumbuza ukhetho lukamongameli ngomnyaka ka2008 okwahlala isikhathi eside kungaziwa ukuba kuzakwenzakalani njengobe owayengumongameli uRobert Mugabe wayenqotshwe nguMorgan Tsvangirai webandla eliphikisanyo eleMovement for Democratic Change.

Kulabanye abantu eZimbabwe abathi ukuxokozela phakathi kuka Mongameli Donald Trump loMnu. Joseph Biden, okukhanya enqobe kukhetho lukamongameli, kubakhumbuza okwenziwa yiZimbabwe Electoral Commission eyathula okwesikhathi eside ngempumela yokhetho lukamongameli ngomnyaka ka2008.

UTsvangirai wanqoba uMugabe kodwa kazange enelise ukubumba uhulumende ngenxa yokusilela kwamavoti afunakalayo. Bathi ukukhonona kuka Trump othi waqilwa nguBiden labanye bakhe kuveza ukuba abantu banamathela ezikhundleni loba uzulu esekhethe amfunayo kwezombusazwe.

UTrump lokhu etshaya phansi ngenduku esithi uzaguqula impumela yokhetho lolu athi lwatshontshwa libandla lama Democrats, elilabantu abanengi abavota ngeposo njengenhlalayenza. AmaDemocrats athi selidume ledlula. Banengi abantu kwele Zimbabwe abathi lokhu kubakhumbuza umnyaka ka2008.

Omunye wabo nguMnu. Adrian Phiri, ohlala eHwange esabelweni seMatabeleland North, othi uTrump kumele avume ukuba unqotshwe nguBiden.

UMnu. Clifford Ndlovu, ohlala eZimdabule eNyamandlovu, uthi kuyamangalisa okwenzakala eMelika.

Lokhu kusekelwa nguMnu. Tindo Ndlovu, ohlala eNgwaladi, esabelweni seMatabeleland North.

UMnu. Gabriel Moyo uthi kusobala ukuba ukhetho lweMelika lwenziwa ngemfanelo.

UBiden uselungiselela ukungena esikhundleni lona uTrump efunga esithi lokhu kungeke kwenzakale esaphila.

Usecele ukuba kubalwe kutsha amavoti esabelweni seGeorgia njalo izolo kusihlwa uxoxisane labanye abalandeli bebandla lama Republicans abahlala ePennyslvania lapho azama ukuguqula impumela yokhetho. Uzama ukwenza njalo eArizona leMichigan. Ababona ngokwenzakalayo bathi usephelelwe ngumphako.

Abantu Bakwele Zimbabwe Bamangele Ngokwenzakala eMelika
please wait

No media source currently available

0:00 0:04:42 0:00


'Kuyabukeka Okwenziwa NguBiden'

'Kuyabukeka Okwenziwa NguBiden'
please wait

No media source currently available

0:00 0:03:03 0:00

Ukwengezelela

XS
SM
MD
LG