Umphathintambo wezemigodi uMnu Obert Mpofu sesole kakhulu inhlanganiso ezizimeleyo ezikhankasela ukuthi iZimbabwe ixotshwe enhlanganisweni yeKimberly Process lokuthi ingavunyezwa ukuthengisa amadayimana enjiwa eMarange.
Umkhankaso wenhlanganiso lezi uqhamuke kulandela imbiko ethulwe yisithunywa seKimberly Process eZimbabwe uMnu Abbey Chikane ngeviki edluleyo eyokuthi sokumele iZimbabwe ivunyezwe ukuthengisa amadayimana eMarange ngoba silandele zonke iziqondiso zeKimberly Process.
Inhlanganiso eziphikisa isinqumo sikaChikane zigoqela iGlobal Witness leHuman Rights Watch.
Inhlanganiso lezi zithi zifuna umkhokheli weCenter for Research and Development uMnu Farai Maguwu obotshwe ngeviki edluleyo esetheswa icala lokuqamba amanga ngodaba lwamadayimana eMarange, akhululwe.
Inhlanganiso lezi zithi amadayimana eMarange angcolile, kungakho akumelanga iZimbabwe ivunyezwe ukuwathengisa. Kodwa kungxoxo ayenze loNtungamili Nkomo weStudio 7, uMpofu utshele uNtungamili Nkomo weStudio 7 ukuthi inhlanganiso lezi yizo ezingcolileyo.
