Umphathintambo wezamandla kagetsi uMnu. Elton Mangoma uthi kumele inkampani kagetsi eye Zimbabwe Electricity Supply Authority (ZESA), icitshele uzulu labaphathintambo bakahulumende ugetsi abalezikwelede ezingaba yizigidi ezingamakhulu amane lamatshumi amahlanu amadollar.
UMangoma uthi inkampani ye ZESA isisehluleka ukusebenza izimele yodwa njalo lokulethela uzulu umlilo ngemfanelo ngenxa yezikwelede lezi ezinye zazo ezedlula inkulungwane ezilikhulu zamadollar emelika indlu eyodwa.
Uthi inhlelo ezethulwa yi ZESA ezazisenza ukuthi uzulu, abaphathintambo bakahulumende kanye lamalunga edale lephalamende babhadale abakwenelisayo ngenyanga sokwehlule ngakho-ke sokumele kucitshwe umlilo kagetsi ezindlini zalabo abangabhadaliyo.
Uqhubeke phambili uMangoma ethi kulabanye abagoqela iziphathamandla zikahulumende abangabhadalanga umlilo kagetsi kusukela ngomnyaka ka 2009.
Umnu. Moses Mare okukhomithi yedale lephalamende ebona ngamandla kagetsi lezemigodi uthi kumele labaphathintambo bakahulumende abangabhadaliyo bacitshelwe umlilo lo ukwenzela ukuthi kuthuthukiswe inzuzo etholwa yi ZESA ukuze yenelise ukubhadala isikwelede senkampani ye Hydro Cabora Basa ye Mozambique efuna phose izigidi ezilikhulu zamadollar eMelika.
UNkosikazi Lucky Moyo oyisakhamuzi sako Bulawayo uthi okusindayo yikuthi iziphathamandla zikahulumende kazisoze zicitshelwe umlilo kagetsi.
UMnu. Winos Dube ongumgcinisihlalo we Combined Bulawayo Residents Association uthi kumele uhulumende adinge imali yokwehlisa umlilo kagetsi othengiselwa uzulu ukwenzela ukuthi abantu makhaza benelise ukubhadala imali efunwa yi ZESA ngenyanga.
Ukuze sihlaziye isinqumo sikamphathintambo wezamandla ka getsi uMangoma esokuthi abantu abalesikwelede kunkampani ye ZESA bacitshelwe ugetsi ngendlela yokubabamba ngamandla ukuthi bebhadale, uSithandekile Mhlanga weStudio 7 uxoxe loMnu. Mfundo Mlilo, umqondisi wenhlanganiso elwela amalungelo ezakhamizi eye Combined Harare Residents Association, endawonye loMnu. Dumisani Nkomo, ingcwethi ecubungula ezombusazwe.
