Ingxabangxoza ikhanya iqhubeka kudaba lokulotshwa kutsha kwesisekelo
sombuso, kuphuma imibiko eyehlukeneyo yokuthi uhlelo lokuyathatha imibono kazulu solumisiwe, abakhokhela loluhlelo kudale lepalamende i
Constitutional Parliamentary Committee-COPAC, besithi umsebenzi
uyaqhubeka ngemfanelo.
Omunye wabagcinisihlalo be COPAC uMnumzana Edward Mkhosi utshele umsakazo weStudio 7 ukuthi okuhluphayo yikuthi akukavunyelwana ukuthi ngobani abazaloba imibono ezavela kuzulu, ngamabandla womathathu akuhulumende womanyano, esithi kuhlupha njalo udaba lwemali.
Inhlanganiso elwela ukulotshwa kwesisekelo sombuso esitsha iNational
Constitutional Assembly isola uhlelo lokulotshwa kwesisekelo esitsha
oluqhutshwa nguhulumende.
UMnumzana Rejoice Ngwenya yingcwethi ecubungula ezombusazwe, njalo
engomunye wabantu abangene izifundo zokuyathatha imibono kazulu ezangena kusisekelo esitsha lapho sesilotshwa.
UNgwenya utshele uBrenda Moyo weStudio 7 ukuthi ngengxabangxoza ekhona ekuqhutshweni kohlelo lokulotshwa kutsha kwesisekelo sombuso, abazangena kuzulu lokhe bengakaziswa ukuthi bazakuya kuziphi izigaba lokuthi bazahamba nini.
