Inhlanganiso yeHuman Rights Watch yethule ugwalo ngoLwesibili oluveza uncindezelo olukhulu kwezokwethulwa kwemibiko lokwenqatshelwa kwenguquko eZimbabwe.
Ugwalo lolu, olulamakhasi angu 24, uveza njalo amaqhinga asetshenziswe yiZanu PF ukumemethekisa imibiko yamanga ngezombusazwe kanye lokwenqabela ukwethulwa kwezindaba ezingathathi hlangothi isebenzisa imithetho yoncindezelo elokhu ingakaguqulwa.
Ugwalo lweHRW lulesihloko esithi ‘Ukuncindezelwa kwabezindaba lokwenqatshelwa kwenguquko eZimbabwe’ njalo luveza mgceke amaqhinga ebandla leZanu PF okukhohlisa umhlaba ukuze ubone angathi uhulumende sehlonipha ilungelo labezindaba eZimbabwe.
I HRW ithi akuzwisiseki ukuthi kungani kuqalwe ngokukhethwa ikomishini yezokwethulwa kwemibiko kukanti umthetho oncindezela abezindaba oweAccess to Information and Protection of Privacy Act ulokhu usasebenza ngemva komnyaka kubunjwe uhulumende womanyano.
Kugwalo lolu, inhlanganiso le ikhuthaze uMOngameli wakweleSouth Africa uMnu Jacob Zuma ukuthi angenele ngamandla ukuze ukudonselana okukhon aphakathi kweZanu PF leMDC kuphele njalo kulungiselelwe ukhetho olutsha.
