Umkhokheli welinye lamacele eMDC, uMnu. Morgan Tsvangirai, oyinhloko kahulumende uthi ukhetho olungenziwa ngomnyaka ozayo kumele lube ngolokudinga umongameli hatshi amalunga edale lephalamende. UTsvangirai utsho lokhu ekhuluma lentathelizindaba eHarare ngemva komhlangano wedale le National Council yebandla lakhe. UTsvangirai uthi kumele umanyano weSADC wenze umhlangano wesiphangiphangi wokuzama ukuqeda inkinga zikahulumende womanyano. UTsvangirai uphinde wakhuthaza uMongameli Laurent Gabgo wakwele Ivory Coast ukuthi asuke embusweni ngoba enqotshwe kukhetho olwenziwe kulelo lizwe ngenyanga edluleyo.
UMongameli Mugabe wazise ukuthi kumele kwenziwe ukhetho kuphela isivumelwano seGPA ngenyanga kaNhlangula ngomnyaka ozayo. UTsvangirai uthi amasotsha asegcwele emaphandleni kumele asuke ukuze kube lokhetho olukhululekileyo.
Kunjalo nje, abecele leMDC elikhokhelwa nguMnu. Arthur Mutambara bathi bavumelana loMnumzana Tsvangirai ukuthi ukhetho kumele lube ngolokudinga umongameli kuphela. Okhokhela amalunga edale lephalamende, uChief Whip, webandla leli, uMnu. Edward Mkhosi utshele iStudio 7 ukuthi ngokwenza ukhetho olulodwa uhulumende ulakho ukulondoloza imali evele etshaya inja ngekhanda.